русский
беларуская
Прадпрыемства ААТ «Труд-Вiцебск» займаецца вырабам медыцынскага адзення, пасцельнай бялізны, а таксама трыкатажных вырабаў пад гандлёвай маркай Truvi. Фабрыка стабільна працуе з прыбыткам. І калі яшчэ тры гады таму тут працавалі толькі 25 швачак, то сёння – больш за 60. Дырэктар Віталь Старыковіч плануе давесці гэтую лічбу да сотні. Дарэчы, ён асабіста ўдзельнічае ў размеркаванні маладых спецыялістаў індустрыяльна-тэхналагічнага каледжа. Выбірае лепшых з лепшых. А тыя выпускніцы, якія раней праходзілі практыку на дадзеным прадпрыемстве, самі імкнуцца трапіць сюды пасля вучобы.
Сёлета ў ААТ «Труд-Вiцебск» адкрылі яшчэ адзін швейны цэх, дзе асвойваюць тонкасці майстэрства новаспечаныя работніцы. - За кожным маладым спецыялістам мы замацавалі дасведчанага настаўніка. Таксама ў цэху працуе дадатковы тэхнолаг. Бо часам пачаткоўцам трэба не толькі дапамагчы наладзіць абсталяванне, але і «пасябраваць» з ім. Некаторыя проста баяцца садзіцца за машынку, – распавядае Віталь Старыковіч.
Дырэктар упэўнены, што для замацавання маладых кадраў патрэбны адпаведны мікраклімат: ва ўсім дапамагаць, не ціснуць, не патрабаваць на першым часе стоадсоткавага выканання плана. Такая палітыка хутка дае вынік. Праходзіць два месяцы, а пачаткоўцы ўжо лёгка выконваюць палову нормы. І гэта вельмі добры паказчык. Маладым спецыялістам выплачваюць па 100 рублёў дадаткова, пакуль тыя не наб'юць руку і не змогуць выходзіць на план. А іншагароднім прадастаўляюць інтэрнат.
- Мы набіраем людзей пастаянна. Плошчы даюць магчымасць яшчэ ў два-тры разы павялічыць колькасць работнікаў. Гэта дазволіць знізіць сабекошт, павялічыць працэнт вырабу ўласнай прадукцыі ў адносінах да давальніцкіх заказах, – дзеліцца стратэгічнымі планамі дырэктар.
На закупку абсталявання для новага цэха было выдаткавана больш за 50 тысяч рублёў з прыбытку. Аб'ёмы вытворчасці дзякуючы павелічэнню колькасці швачак выраслі сёлета ў паўтара раза. Выручка ў параўнанні з мінулым годам падвоілася. Фабрыка не адчула санкцыйнага ціску, бо асноўнымі партнёрамі былі і застаюцца прадпрыемствы Расейскай Федэрацыі.
Прадукцыю ААТ «Труд-Вiцебск» можна набыць на міжнародным маркетплейсе Wildberries, асаблівай папулярнасцю карыстаецца медыцынская адзенне. Пазнаюць пакупнікі і брэнд Truvi-ўтульную трыкатажную вопратку для дома і адпачынку. Дарэчы, нядаўна фабрыка запусціла вытворчасць талстоўцы оверсайз на маланкі.
Буйнай замовай павярнулася паездка ў Расійскі Курск: Віцебскае прадпрыемства цалкам "апранула" абласную клінічную станцыю пералівання крыві. А нядаўна тут вырабілі партыю брэндаванага медыцынскага адзення для адной з сеткі мінскіх аптэк. Працягвае прадпрыемства і выпуск аднаразовага медыцынскага адзення, запушчана вытворчасць вільгацепаглынальных аднаразовых прасцін. Толькі гэтай прадукцыі штомесяц прадаюць на 10 тысяч рублёў.